接阿媽返屋企住，轉眼差不多有半年喇！呢半年來，阿媽慢慢從院舍適應返屋企嘅生活。在照顧上，有很多摸索仍在發現當中。
留在院舍照顧好抑或在家照顧好？兩樣都試過之後，有辣有唔辣，並不能夠一概而論。以下呢張圖可以比較一下，住院舍和在家安老嘅生活作息表，點擊可以放大：
在院舍和在家照顧，有好有唔好，我唔敢講留在屋企一定會比院舍好，始終每個人嘅情況唔一樣。一切視乎長者嘅身體情況、屋企人嘅照顧能力、經濟能力、提唔提供到一個安全舒適無障礙嘅環境（延伸閱讀：認知障礙家居設計，大學問！）。
院舍係一個方便嘅選擇，院舍有護士分配藥物，又有社工安排不同的活動，亦可以按個人需要參加自費的物理治療、職業治療、感官治療、香薰治療、音樂治療。*不過，照顧有不足時，就要自己補救。例如「活動時間」沒有活動就只喺坐在飯堂發牛豆，沒有足夠的運動，影響胃口、睡眠質素。我地嘅改善方法係聘請長者照顧鐘點，每日下午帶阿媽落公園散步、曬太陽。另外，有認知障礙症嘅院友，因為行為問題，同時防止佢地遊走，一般都會使用「安全衣」綁住佢地，咁對情緒就有好大影響。情緒唔好，加上冇足夠運動，胃口差、無飲水、無大便、瞓得唔好，情況如果得不到改善，身體就會一路差落去、瘦落去，醫生便要處方的精神藥物控制情緒。
*視乎個別院舍而定。
而返屋企好多野就要自己動腦筋、付出更多心力閒暇，同埋需要嘅時候要識得搵人幫手。可以同大家分享，阿媽返屋企住之後的轉變。住屋企環境會休閑一些，唔會著「安全衣」、唔會坐大班椅，只有「離床警報器」來得知佢離開左張床，同埋減低跌倒受傷的「防跌倒安全地墊」，好自由。而其實畀左呢個自由佢，情緒好左，佢都唔會濫用呢個自由，因為佢自己都好怕跌倒。
另外，因為生活作息可以自由安排，所以返屋企住每日都安排到兩節散步或運動時間，曬太陽、吸下新鮮空氣，保持足夠運動量，令每餐都會覺得餓、口渴，有胃口食飯；補充足夠嘅水份，也有助排便。好好運動、好好食飯、好好飲水、好好痾屎、好好睡覺（延伸閱讀：點樣應付認知障礙異常嘅行為問題？），一環接一環，阿媽的行為問題在家得到紓緩。除左運動、飲水，中醫的輔助也幫助調理身體，依家已經唔洗再飲大便水和塞甘油丸通便。醫生也開始減用幫助控制情緒的藥物。
住院舍有一班老友記一齊玩、一齊食飯，有social life。在家安老，就要自行安排長者去日間中心「返學」。阿媽返到屋企之後，開始講少左野，人始終係群體動物，維持社交生活先會健康。之後安排左佢去為認知障礙症長者而設的日間中心「返學」，各種活動能刺激腦袋，減慢衰退。普通的資助日間中心也有提供認知障礙活動；但最好選擇專為認知障礙症患者的日間中心，活動更切合他們的需要。此類服務須自費或可申請長者社區照顧服務券。
整體黎講，如果情況許可，家人也有足夠的心力人力物力，在家安老可能會比住院舍好。返屋企會比起住院舍自由，可以自由安排作息、運動、吃飯嘅時間，多飲水，又可以自由地去廁所，減少依賴使用尿片。住院舍就有護士幫忙，可以安排各種治療，打風落雨都有護理員，照顧穩定，照顧者有多啲自由時間做自己野，冇咁困身。每樣野都有好有唔好，無野十全十美，最緊要係自己能力範圍可以做到，同時又尊重到老人家的心願。如果有勉強，大家都會唔開心。
一切都係選擇。媽媽依家能夠有一個比較安樂嘅晚年生活，如願足矣。
小小廣告，介護食已經上架喇！大家有興趣或想試，歡迎去我的商店睇睇！多謝大家！
