凝固粉應該點揀？

凝固粉（Thickener）對於有吞嚥困難嘅患者黎講，係必需品。飲水、飲湯、飲茶、飲果汁，只要加適當份量嘅凝固粉，就可以大大減低「濁親」嘅機會。

上一篇文章提到，言語治療師對吞嚥困難嘅患者非常重要。言語治療師除左會同患者做一連串嘅舌頭、口腔練習，改善吞嚥技巧之外，仲會揀一款合適嘅凝固粉、建議合適黏稠度俾患者。喺未有得見言語治療師之前，應該點揀？以下四款有用過嘅凝固粉，主要分別係唔同牌子除左價錢唔同，沖出黎質地、用法有分別。

市面上唔同牌子嘅凝固粉，而我只用過呢四款，主要可以歸納為「布甸狀」同「啫喱狀」兩個質地。

「布甸狀」凝固粉：雀巢快凝寶、凝固樂。主要成份係改性澱粉，可以迅速令水份「變杰」。適合一啲無咁嚴重嘅吞嚥困難患者，因為佢地口腔肌肉控制得比較好，水份變杰少少，可以好似病之前咁飲水。市面上，普遍售賣呢款價錢比較相宜嘅凝固粉。

「啫喱狀」凝固粉：快凝寶清透配方、吞樂美。主要成份係黃原膠，沖水等一陣「變杰」。我媽成日含住啲水吞唔到，控制口腔肌肉能力低啲，呢種凝固粉穩定性高啲，唔會因為攪拌得多「化水」，就岩佢。但價錢會比「布甸狀」凝固粉貴，售賣點亦比教少。下一篇會講下，點樣買呢款凝固粉會抵啲。

有左基本嘅認識，大家可以就住自己需要，睇成份標籤就搵到適合嘅凝固粉喇！

延伸閱讀：
對於有吞嚥障礙嘅老人家，點做先唔會「濁親」？
終於俾我搵到買「吞樂美」最抵嘅方法！
食物勾起回憶，不單單在咀嚼