DIY靚相壁報，辨認力提升好easy!

初入院舍，地方好陌生、人好陌生。正常人適應新環境會害怕、惶恐、驚慌，情緒變得不穩定，我媽媽更加明顯。唔知道行左去邊、周圍啲人一個都唔識、唔知邊度黎成日話要返屋企。

我媽問職員，佢啲細路去咗邊度啊？職員同我媽講「你啲細路返晒工喇」，我媽媽當然唔信。職員唯有次次打電話俾我，俾我同阿媽講「係啊，我真係返緊工啊！」情緒紓緩左少少，但佢仍然好激氣。當佢情況不穩定的日子，我媽佢會連仔女已經長大成人都唔記得左，太激動個陣，不論日頭夜晚都要搵返佢啲仔女。

所以，我決定動手整個貼滿相片嘅床頭壁報。

如果睡床前面係床頭櫃，可以直接將相片貼在櫃子上。壁報底色要溫暖一點，最好暖色系，淡黃色、粉紅色、天藍色也不錯，最後我揀左粉紅色，同相片之間有多點顏色對比，有多點刺激。相片大小係4R，對眼唔太好嘅老人家，曬大張啲會睇得舒服點。壁報可以同老人家一齊整，曬多點相片，俾老人家揀佢中意果張，揀得果張望住會開心一點。

整完壁報，希望可以俾佢認住自己嘅房間、自己張床位，辨認位置好輕鬆；區分到貼相嘅位置係自己地盤，安穩地睡；相片上有家人朋友最近的模樣，比佢認住，若果「師傅到」要搵人搵細路果陣，輕鬆指出可增加說服力，最緊要係睇左相之後，「有相便為真」平伏情緒。DIY壁報，加點心思齊齊做，平日就算家人不在，望住都可以感受到家人的關心。住屋企嘅都可以整架！

大家都可以試下做啊！