牙痛慘過大病(上)

呢幾個月前後帶我媽都睇過三個牙醫。只可以講,唔係每一個牙醫都了解老人家住老人院嘅情況。

院舍嘅老人家都唔刷牙?

老人院隔日沖一次涼,其實每日刷牙同沖涼喺一樣咁重要架!對於一啲行動不便嘅老人家,或者好似我媽咁有時「師傅到」而被要求穿著安全衣,即使可以揸住柺杖都唔可以隨便自己喺院舍走動去廁所、刷牙洗面。或者會話,叫人扶住去廁所咪得囉,每個院友床前都有一個「叫人鐘」。

無錯!正常嘅老人家可以咁做,但係對於一啲患上認知障礙嘅人嚟講,佢地時空混亂,呢一刻忘記自己下一刻跟住要做乜,佢又點識自己按鐘叫人扶住去廁所刷牙呢?我媽食完晚餐、飲完宵夜奶之後,去唔到刷牙,又唔識按鐘叫人帶佢去刷牙,所以佢啲牙成日會有啲食物碎「攝」住喺牙隙,久而久之,成副牙差唔多全部有蛀牙。

如果用0分到10分去形容我媽口腔健康情況,會係0分。

大家諗下,有認知障礙嘅老人,唔識去/叫人去刷牙,或者有人會話,人老左會甩牙,好正常,但係呢個可以透過適切安排,令牙齒保養得好啲。牙齒保養得好啲,減少牙痛之苦,甚至可以預防再次中風*。

如果用0分到10分去形容我媽口腔健康情況,會係0分。住喺院舍,其實刷牙同沖涼喺一樣咁重要!(資料圖片)

點解維持口腔衛生咁重要?

口腔衛生做得好唔好,完全影響生活質素。將心比己,牙痛起嚟,有苦自己知。每次我探我媽,佢都係會指住自己啲牙,同我講好痛啊!牙痛慘過大病,啲牙日痛夜痛,瞓唔到覺,心情唔好,加上好多食物食唔到,人生無樂趣,唔開心。

樣樣加埋,我只想講,維持良好嘅口腔衛生好重要。而呢個咁重要既照顧服務,唔屬於院舍住宿必須提供嘅服務之一,其實一年一次牙科保健都不及日常口腔清潔重要。(我知,又是人手問題做不到嘛⋯⋯)

唔係想嚇大家,而係我媽啲牙短短兩年半,牙齒由光滑潔亮變到衰過呢張資料圖片。

只係我諗唔到除左請多一個外藉傭工上去幫手,仲可以點做,而暫時能力所限又請唔起,唉。事情已經變到咁先覺悟到,好似亦有點遲⋯⋯當大家老左嘅時候,想唔想有尊嚴、有生活質素咁生活,唔知大家覺得咁樣痛法會點呢?

下一篇會詳細講下睇牙醫經歷。睇牙醫先知道,原來好多醫生都唔了解有認知障礙老人住老人院嘅局限,連牙痛醫牙,都未必做得到。

 

*附註:研究發現-「口腔細菌脂入血 可致心臟病」,口腔細菌會藉傷口進入血管,增加血管栓塞嘅風險。咁即係中風機會都會增加。患上血管性認知障礙,一定要好好預防中風。維持口腔衛生,亦係預防中風嘅方法。

牙痛慘過大病(上)
分享此文:

You May Also Like