我媽生蛇啊…

最近唔係因為懶惰而唔寫文，而係太多嘢處理。

話說我媽背脊之前沖涼感染左體癬，主要係受真菌感染而得，加上營養不良、個人衛生不佳、環境潮濕、免疫抵抗能力低，就好容易反覆受感染。所以，本來已經好返一陣，但近日又復發。醫生開左藥俾佢搽，但過左兩、三日之後，紅點擴散，再睇另一個醫生，醫生話係癬發炎，皮膚出現紅斑、痕癢、疼痛、出現水疱，皮膚剝落。醫生判斷似乎正確，於是開另一隻藥力重的類固醇藥膏及口服藥，可惜都係好癢。

我第二日上院舍見不妥，新紅點似乎同以往的體癬形狀不一樣。體癬呈淡紅色大圈，甩皮；新的紅點冇呈現大圈，有水疱，跟癬發炎的病癥相似，可是呈直線分佈，從上背一路到屁股對上位置都有，而且擴散得好快，類固醇藥膏唔係好止到痕，不斷用手抓。



其實生蛇初期既病癥同好多皮膚病都好相似，而紅點不會太明顯，但會開始有刺痛感。如果起初啲「蛇」生喺胃或心臟附近皮膚，感到刺痛唔舒服，更會有醫生誤以為是胃病或心臟問題。所以，生蛇通常在一兩星期之後，病癥變得明顯才會確診。又，上次我生蛇，睇皮膚科醫生，吃特效藥、消炎藥、止痛藥，要差不多兩星期才紅腫痛才消除，而我同學同時生蛇，但一個星期之後痊癒，所以我決定帶我媽睇中醫。

我媽食緊薄血丸，佢唔適合做針灸。在院舍住，煲藥唔方便，於是中醫師開左片仔癀口服及外用。兩粒片仔癀，中碎成粉末，分十份。八份口服，兩份外用。口服沖水服用，一日兩次。外用，先用一份粉末加入米酒，塗抹患處，止痛消腫。過左五日之後，已經退水疱，消紅腫了。太好喇！

而家飲緊羚羊角絲煲水作保健。之後好返晒，再帶佢打生蛇疫苗。