你可唔可以將你個女嫁畀我啊?

12月一眨眼就過了⋯⋯很多事情還是在忙著呢!

1. 帶媽媽去尖沙咀睇燈飾,問佢「呢度係邊度啊?」佢諗都唔洗諗「尖沙咀!」果然有回憶嘅地方,一問就答岩喇!好叻囡啊!果晚在尖沙咀,睇聖誕樹、聽聖誕歌,見到媽媽好開心,我都好開心。

2. 工人姐姐剛到埗,朋友比左個PDF我,係一本用印尼文寫成關於照顧認知障礙症患者嘅小冊子,姐姐用左幾晚睇晒,佢話對呢個病多左好多了解,thank you mum. (嗯⋯⋯其實我仲好後生⋯⋯)

各種護理的工作,姐姐都好快上手。工人姐姐來了一個月,照顧的確輕鬆了不少,也安心了不少。沒有姐姐的時候,曾經每天放工後趕到院舍,就是為了給媽媽喝一點水,跟她散步,檢查尿片和洗屁屁,有時遲了或者去不到,心情就會很焦躁,這個月真的安心了不少。

媽媽同工人姐姐磨合得唔錯,當我媽唔願意運動、唔想郁,姐姐好似教小朋友一樣有耐性,出動法寶不外乎「一擔砂糖一擔屎」,散完步有小食做獎勵。 雖然請工人過程並不順利,被請食過不少檸檬,但最後感恩請到一個很好、很有經驗的姐姐,好好彩,感恩感恩。

3. 過大禮

過大禮果日,一朝早就上左院舍同我媽媽扮靚靚,同佢講,今日出去飲茶同埋「過大禮」啊!佢先係眼仔睩睩咁望住我,然後豎起手指公👍去到酒樓,見到親家一家人已經好感動,然後佢未來女婿同佢提親,問佢:「你可唔可以將你個女嫁畀我啊?」我媽媽熱淚盈眶,當堂哭左出黎,點點頭,我忍住無喊到,我知道呢啲眼淚係開心嘅。

開始食飯一陣,佢又喊過,突然問我今日係咪證婚啊?我話唔係啊!今日係過大禮啊!然後佢又再點點頭。雖然佢好多野都唔記得,但佢仍然知道發生咩事,仍然有作為母親的激動和不捨!

PS我阿媽收左水果藍同埋大利是,仲細細聲問我收左幾多錢禮金添,都咪話唔醒目。哈哈!😆

你可唔可以將你個女嫁畀我啊?
分享此文:

You May Also Like