最近看到新聞，有院舍開始試行「無綁」，唔再以「安全衣」等約束物處理「有行為情緒問題」嘅老人家，去限制佢地既自由，而係透過改變作息時間、調整老人生理時間表，去減少行為問題，令佢地生活得更加開心。其實我心裡面係好高興、好高興，真係好高興。我覺得呢個可以話係一場改革！了不起！十分敬佩可以做到，同時好希望「無綁」可以成為一個潮流，喺香港院舍界慢慢普及。
一般院舍嘅大作息，例如下午四點食晚飯、晚上八點熄燈瞓覺係好難改變。老人家早食飯早瞓就早醒，醒左冇野做，（亂）諗野，加上認知障礙症冇左一啲記憶，就以為天光要起身、要搵野、要搵人，當然想做嘅事唔會咁易達到啦！於是爬床、大叫，情緒激動起來＝有行為情緒問題。為左安全，要穿安全衣、戴約束物。的確，老人家被綁後的情緒只會更差、更激動，情緒激動只有一個下場，綁得更緊。
心裡面雖然期待一天「無綁」會普及，但唔知改變幾時會黎。
好多有認知障礙嘅長者都係因為水份不足，出現意識障礙，別忘記人體七成由水份組成；運動少冇胃口就唔想食野，整整下搞到營養不良，渾身無力疲倦，惡性循環活動能力更低。缺水、無食夠飯，就會無力，痾唔到屎，便秘，大腸為左排便異常興奮，刺激自律神經異常造成情緒不安定，引起異常行為。（資料整理自《失智症照顧指南》）
今日上院舍探媽媽，情緒十分高昂，同我講佢屋企啲貓死晒，佢好傷心，問我係咪真架？佢要去搵啲貓，但比人綁到好實。我知道我媽「師傅到」了。我見扣子上纏著透明膠紙，職員話佢半夜瞓唔到覺，發作得好厲害，自己識解左個扣，無辦法先咁做，建下次覆診試下拎安眠藥。食藥起碼有覺好瞓，瞓唔到影響身體仲大鑊，我明啊。其實為左唔影響我媽得到嘅正常照顧同埋其他院友，睇醫生並且接受藥物治療控制情緒。但，已經食夠多藥了吧？
既然大環境暫時改變唔到，小人物就做點小事。我見好多住院舍嘅老人家都有工人幫手。於是我都請左工人，到院舍既日常工作就係做最基本既：飲水、運動、排便。正正係希望飲水令意識清楚一點；運動減少午睡時間，「除綁」去公園散步、活動身體，消耗能量希望讓晚上有一覺好眠；排便後身心愉快，減少不安。但點解最近方法唔奏效？諗諗下最近一係太曬太熱、一係落雨，冇落公園散步做運動，睇黎室內踩下單車都係唔錯既選擇呢！
